拉布正式開始，苦了議員、益了海都。話說唔少議員預計噚日起午飯時間要醫肚，指定要喺中信大廈嘅海都開餐，一來因為海都同立法會腳程5分鐘搞掂，加上海都好識做，大廳啲電視全部直播拉布戰，議員可以邊食邊贒實幾時要返歸，一聽到響鐘就即時放低筷子，飛奔立法會救亡。
一碗湯分幾次飲
八方粗略計過，拉布議員噚日喺午飯時間，平均15分鐘點一次人數，議員嘴郁郁𡁻住啖飯急步行出行入議事廳嘅場面不斷重演。噚日喺海都開餐嘅自由黨張宇人同工聯會麥美娟，都三度因為點人數，食食吓嘢都要失陪，喺海都至立法會之間路段奔走。點解唔喺立法會宴會廳食？成日流流長困喺立法會喎，出去食餐飯唞吓氣都好合理嘅。
麥美娟話親身測試過，由海都返立法會，5分鐘搞掂，相信喺拉布期間會以海都做開餐首選，至少有電視直播陪食飯，食都食得安心啲！平日罕見喺海都午膳嘅田少亦喺嗰度現身，只見佢如常好鬼紳士咁行返立法會，唔似其他人咁裙拉褲甩。
不過，就算喺立法會宴會廳開飯嘅議員，一樣冇啖好食。民建聯何俊賢腳長行得快，由宴會廳行兩、三步就去到議事廳，但佢嗰碗湯都因為不停響鐘，分咗幾次先飲得晒。民主黨黃碧雲有次以為夠晒人，諗住喺宴會廳食埋個飯先，點知鐘響到只剩一、兩分鐘都未夠數，佢即刻以9秒9速度飛奔入會議廳，好彩有白鴿黨成功防流會，有驚無險。
http://[email protected]