前星期一個晚上，接老婆來電，買啲燒肉叉燒回家加餸，於是七點前走到祖庇利街舊中環街市對面嘅小店金華買燒味，買完走就落停車場攞車啦，燒味師傅竟然話：「對唔住，燒肉賣晒。」唔係呀，燒肉都會賣晒？金華嘅燒肉、叉燒在中環幾出名，但日日供應不缺，點解呢晚會賣清光？師傅話：「阿哥，白菜都賣廿八蚊一斤，食燒肉好抵呀，好多年都未試過一日內我地嘅燒肉會沽清嘅！」
呢輪天氣唔好，蔬菜的確好貴，不少師奶嘆氣話食唔起，好焦慮。純粹睇政府發佈之通脹率，約在3.7%-3.8%之間，話低不算低，話高不算高，但消費者物價指數之計算方法要顧及各類消費價之加權（weight），與我地到街市、超市買食物之感覺不一樣，淨係計菜價、牛肉價，升幅當然高達20%、30%啦，主婦買餸豈能不焦慮。
中大醫學院香港健康情緒中心委任中大傳播與民意調查中心做調查，訪問5118名18至64歲市民，樣本頗大，有代表性，調查發現5%人士有焦慮症，27.5%受薪者表示受通脹好大或幾大影響，呢批人嘅焦慮症發病率有11.4%，比其他人高出3.4倍，收入愈低者發病機會愈高。
唔怪得李誠教授在發佈會搵埋羅家聰博士出席，羅家聰曾被稱為本地末日博士，即係話佢時常唱淡。唱淡之人通常冇唱好人士咁受歡迎，不過羅家聰自有一套，不受人左右，要駁到佢呀，幾唔易㗎，佢精於利用互聯網搵資料，搵乜就有乜，圖表多籮籮，點同佢拗呀？李教授搵羅家聰，原本係要佢講吓紓緩通脹壓力之道，點樣對抗通脹，羅家聰指樓價（衍生租金），食物價帶動物價上漲，解決方法之一係港元與美元脫鈎，認真政治不正確，講極政府都唔會聽嘅。減持現金改買股票及其他資產保值，對中產有一定作用，但對家無恒產者，如同何不吃肉糜，歸根究底，各國中央銀行拚命量寬維持超低至零息，極度傷害退休及低收入人士，游資太多，搶貴樓價，香港首當其衝。所有政府都不敢阻止央行印銀紙，任李誠呢位大國手點樣叻法，都難以阻止通脹焦慮症。