【本報訊】中環士丹利街早在戰前已有「為食街」美譽，在中環鬧市燒製的一樂燒鵝，13年前加入為食街，去年躋身《米芝蓮飲食指南》，一隻燒鵝髀索價78元，全隻燒鵝盛惠400元，依然其門如市，藝人關之琳、終審法院前任首席大法官李國能也是座上客。
士丹利街歷盡變遷，一樂燒鵝老闆朱建輝也飽經風浪，七兄弟姊妹中，五人得了母親的遺傳性腦腫瘤，相繼離世，只餘下排行第四的他與大哥朱建華，自此朱建輝抱着「今朝有酒今朝醉」的人生態度，「我只係想快啲過完呢一生，做得咁辛苦為乜嘢？」
「只斬燒鵝 冇斬過人」
他憶述昔日歲月，年輕時入過勞教中心，後來在澳門經營地下賭檔、放數，也染指色情事業，曾經月入逾百萬。「我冇入過黑社會，但黑社會啲人跟我！一生只斬燒鵝，冇斬過人，也不偷不搶！」最後幾百萬身家一鋪輸光，只好返港，退隱老父開設的大埔一樂燒臘飯店。
2000年老父分家，大埔老舖交長子主理，又打本100萬元讓朱建輝在中環創業，可是朱建輝卻懶懶閒。老闆娘孫長瑜當時產後未坐完月，「老公根本唔想做，但仔女都要開飯㗎！」最後落戶陸羽附近的舖位。
開業頭幾年，生意慘淡，加上朱建輝背着幾十萬賭債，生活壓力接近爆煲，曾賭氣說：「咁辛苦，又冇生意，細路點養呀？不如去搶啦，搶仲快啦！」惟妻子苦苦相勸，加上大哥每晚不辭勞苦，收舖後從大埔到中環指導，終於馴服浪子，用心燒鵝。
2007年終於還清賭債，去年小店躋身米芝蓮，聲名鵲起，但基於他的前科，妻子掌握財政大權。老闆娘長得標致，另一半卻粗豪麻甩，「我以前喺深圳做化妝小姐，好貪靚㗎，𠵱家化嚟畀邊個睇？」
夫妻一旦鬧別扭，朱建輝決不認低威，老闆娘苦笑道：「我同佢道歉囉，佢雖然脾氣臭，但過一陣就冇嘢。」朱老闆的罪狀越數越多，「佢好執着，做一樣嘢一定要咁樣，唔係咁就一定唔得！」其實老闆娘明彈實讚，「因為佢咁堅持，啲鵝先咁靚！」全程被數落卻默不作聲的朱建輝，趁老婆轉身招呼客人時，低聲吐出心底話：「佢係美女，我係野獸。其實我更愛佢，只係我唔識表達！」
