土地註冊處資料證實，「玩具大王」蔡志明細女蔡加怡（Crystal）上月以1.01億元，買入大埔天賦海灣一期5座頂層全層三個單位。
蔡志明：未必自住
蔡志明噚日接受電話訪問時話，阿女鍾意呢個物業嘅無敵全海景，咁就扑槌買，未必用嚟自住。
Crystal舊年同設計師陳漢聰拉埋天窗，玩具大王送咗間市值4億嘅獨立屋畀佢哋，間屋就喺蔡家位於九肚山嘅大宅附近。
蔡志明透露，呢間屋裝修緊，阿女仲住喺女婿屋企，新買呢層天賦海灣未必自住，阿女鍾意就買。
擁望海景戶外泳池
蔡加怡以1.01億元買入大埔天賦海灣一期5座頂層全層三個單位，實用面積合共4,728方呎，其中A室單位超豪，有四間套房之外，仲要有望海景嘅戶外泳池，又內置一條樓梯上去3,000幾呎嘅私人平台。靚成咁，蔡小姐只係想買嚟擺都未定！