上周車仔被紅軍逼和，令同周贏波的阿仙奴爭取歐聯席位的形勢更明朗。兵工廠、熱刺與車仔3隊球迷，當然希望自己愛隊來季有歐聯踢；但若非3隊球迷，又會最想邊隊出局呢？
讓阿巴受點教訓
3隊中，我首先最想車仔出局，絕不是針對球隊，而是針對兩個人：教頭賓尼迪斯同老闆阿巴莫域治。賓尼迪斯連球迷都日日入場舉牌嗌口號鬧衰佢，其實已得到「應得」懲罰，唔多講。但老闆阿巴，已經唔止一次胡亂炒走捧盃功臣。可能阿巴心諗：「有啲工人肯一更返24小時，都係自願；我請嘅教練明知我有鋪『炒人癮』都照上工，都係自願？！」呢啲咪為富不仁囉！為咗戥迪馬堤奧不值，我認為要畀啲教訓阿巴至得。現車仔要分心歐霸盃，餘下英超還要面對曼聯、熱刺及遇強越強的愛華頓，無疑賽程最難啃，可能個天都唔幫佢。
至於阿仙奴，雖然我一直很欣賞雲格這位領隊，可惜都想這季他們失落歐聯席位。兵工廠管理層年年賣人，卻年年過骨，若不受點沉重教訓，一定不會痛定思痛，繼續他們selling club的作風，長遠只會苦了雲格及一眾廠迷。
至於熱刺，資源有限，卻炮製出一隊踢法悅目的球隊。教頭波亞斯上周擊敗曼城一役，安排加里夫巴利左腳打右、迪科爾做後備殺手等，逐漸顯示自己為有料之人，足以在英超立足。個人最希望下季他可帶領更強的熱刺，挑戰歐洲列強。能否成功，關鍵當然是5月9日作客車仔的補賽了。
方柏翹
now足球評述員