年屆花甲、做勻證監會同港交所（388）嘅狄勤思（Mark Dickens）原來係資深煙民，食咗40年煙，難怪佢今個月頭正式過檔財務匯報局，辦公室由中環搬去金鐘，已經摸熟附近嘅抽煙勝地，就算煙癮起，走去叉電亦冇難度。
狄勤思噚日首次以財匯局行政總裁身份見傳媒，閒談間自爆食煙40年，即係20歲開始抽煙。行近啲睇，佢人中位嘅鬍鬚有啲黃，唔知係咪食煙食得多，變成吸煙印記呢？
除咗表面印記，抽煙多，喉嚨亦可能唔係咁舒服，傾傾吓佢突然痰上頸，咳咗幾聲，好在佢準備好潤喉糖，隨手喺西裝袋拎出漁夫之寶嚟嗒。
冇做港交所咁忙
狄勤思喺1991年由澳洲嚟香港，加入證監會，09年加入港交所，離職前係上市科主管，喺香港監管界打滾咗22年，見盡古靈精怪嘅上市公司，過檔財匯局查數應該易如反掌，反正以𠵱家標準，60歲唔算老。
佢話唔退休，主要係新工作嘅性質同佢以往做開嘅差唔多，加上「想繼續喺香港金融界工作，同good guy合作」，家陣工作亦冇以前咁忙。孖屐就唔係咁睇，皆因財匯局正同會計師公會同政府商量，點樣做個獨立審計監管改革，狄勤思遲啲有排忙就真。
李華華
mailto:[email protected]