新地（016）大股東郭氏家族持有嘅山頂施勳道37號豪宅項目，08年底突然決定重建成七幢獨立屋，事隔五年，近期已經落成兼批出入伙紙。呢個項目原先用嚟收租，將來賣定租，郭氏三兄弟有冇坐埋傾傾呢？
未入伙已有保安把守
華華噚日行經上址，發現個盤起得八八九九，門口寫住施勳道35、37、39號同種植道42號，無論建築外形、風格，同鄰近由新地發展嘅倚巒有幾分相似。
𠵱家地盤仲有工人出入，估計仲做緊單位內部裝修工程，雖然未有人入住，但係門口已經有保安人員把守，守衞森嚴。
郭氏家族早於1993年以1.23億元買入呢幅地，原先有八間獨立屋用嚟收租，其後補地價重建，總樓面面積近3.6萬方呎，觀乎𠵱家山頂黃金地段嘅新樓買少見少，保守估計每間屋嘅市值逾5億元。