狼振英揸fit年代，估唔到唐營都有運行，仲獲中央高度重視。由唐唐密友林建岳任監事會主席嘅經民聯，周末起訪京兩日。特別之處係呢個舊年10月先成立嘅新組織，獲張曉明話事嘅中聯辦寵愛，據知中聯辦極可能派出副主任級數人士隨行，殷曉靜係大熱。
八方聽聞佢哋會獲港澳辦官員接見，仲會同各部委高官交流，相信限奶令會係熱門話題。
不過呢，至少兩位經民聯立法會議員唔上京。石禮謙就以立法會帳委會開會為由唔隨行；劉皇發亦唔去趁墟，原來佢係怕咗北京……嘅天氣，事關發叔嘅氣管麻麻哋，仲食緊藥；為免霧霾令佢病多幾錢重，寧願乖乖留喺香港喎。