中信泰富（267）澳鐵礦項目唔單止多次延遲，最近仲捲入官司，同澳洲礦業大亨對簿公堂，被追數最多16億元。基本上，散戶對中信泰富已經冇乜寄望，今年初開始沽貨潮未停過，股價由約14元跌到噚日得番約9.35元，而且仲未脫離下降軌道。
四成大行叫沽貨
不過，從技術走勢睇，短炒散戶或可小注吸納，博短線反彈10%，見10元水平走人。第一，中信泰富RSI出現背馳，雖然股價一直尋底，但RSI自3月開始維持橫行狀態，說明中信泰富可能已慢慢變強；第二，STC都開始突破超賣區，並有向上展開升勢迹象；第三，高盛都認為，雖然澳鐵礦項目拖累中信泰富NAV，但目前股價已經相等於今年預測NAV有28%折讓，已反映大部份壞消息。
睇番基本因素，中信泰富舊年盈利已差過預期，倒退25%至69.5億元。最近又宣佈，澳礦項目首批精礦粉要延遲至下個月下旬先可以出口。其實，穆迪已經提醒大家，不論生產線營運，定係再建設新生產線，中信泰富都仲有好多難關要過，未必好似預期咁順利，如再爆壞消息就隨時降級。
根據彭博最新數據顯示，四成大行都叫沽貨，中信泰富現價PE為5.28倍，但預測PE為8.93倍，反映今年盈利又會繼續倒退，呢隻股真係宜短不宜長。
瑪姬兒