中央銀行嘅主要職能係負責制定貨幣政策，畀人較為嚴肅嘅印象，相信無乜人諗過喺央行大樓舉行婚禮。不過，南韓央行喺下個月開始，就會重新向員工提供呢項服務。一對新人除咗可以接受親朋戚友嘅祝福，仲有一眾前央行行長做見證，事關佢哋嘅相掛晒喺禮堂入面。
聘請顧問教佈置
呢項唔係新服務，南韓央行90年代推行過，有位仁兄當年就係喺度邀請200人觀禮，後來呢項服務以保安為由取消，最近加強咗保安，先至重推。負責準備場地嘅同事冇籌備婚禮嘅經驗，惟有請教顧問，就連新娘房點解要好好佈置，顧問都要講幾粒鐘。
查實日日喺度返工，點會有人想喺工作嘅地方結婚呢？原來呢個係韓國文化，政府機構同三星呢類大企業，除咗出糧，亦要關懷員工同佢哋家人嘅身心健康，搞吓啲活動聯誼，因此南韓人對呢單嘢冇乜反應。