張震遠噚晚應光華新聞文化中心邀請，分享佢嘅「香港夢」。原來佢嘅香港夢，就係將梁振英施政報告讀一次，其間提及好多梁振英提出咗嘅土地房屋政策，力撐幾年後房屋供應多咗，樓價就會「軟着陸」喎！佢亦不忘幫梁振英解圍，話前朝起公屋起得少吖嘛，咪搞到基層上唔到樓要住劏房囉。又係呢招，悶咗少少囉。
提到賑災基金，佢就好豪氣咁話一億對香港嚟講唔係大數目啫，暗示濕濕碎啫，仲提醒議員唔好因為上次地震嘅個別行為而抹黑內地政府，應該盡快通過撥款喎。
被揭曾經參加過共青團嘅梁振英愛將陳冉，𠵱家已經去咗張震遠搞嘅商品交易所任職，佢噚日都到現場幫手打點，好容光煥發。前無綫主播、現職市建局嘅郭詠琴，噚日都有陪住張震遠出巡。