香港風水師蘇民峰睇風水命相,睇到豬籠入水,仲撈埋飲食、旅遊電視節目。泰國有位桌球手嗰樣激似蘇民峰,不過打波十幾年,成績唔算標青,直至星期二喺英格蘭設菲爾德舉行嘅世界桌球錦標賽首圈一舉成名,爆冷以10:9力壓世界排名第5嘅麥圭亞晉級!
呢位「泰國版蘇民峰」叫德差瓦(Dechawat Poomjaeng)已經34歲,髮線不斷向上移,前額禿禿哋,又有對大耳朵;驟眼睇,仲以為係蘇師傅失散多年嘅兄弟。德差瓦90年代尾開始打波,最大成就就係10年廣州亞運贏過男子英式桌球銅牌,同年贏埋世界業餘錦標賽冠軍。
桌球界笑匠專討球迷歡心
風水輪流轉,世界排名第70位嘅佢喺世錦賽大發神威,外圍賽先連贏4場,成為繼華達拿、泰彼捷(Tai Pichit)後,第3位入正賽嘅泰國球手,亦係佢嘅零的突破。呢位「中佬新丁」可能唔太習慣大場面,一入場就爆出笑料,行錯方向去咗另一張球枱;不過之後就好誇張,長枱、中枱、士碌架瓣瓣掂,入波或者打失嗰陣都七情上面,一時大笑,一時嘆氣,好識搞氣氛,好快就得到觀眾歡心,能夠同大賽經驗豐富嘅麥圭亞打成均勢,兩人激戰至9:9。
見慣大場面嘅麥圭亞呢個時候手緊,打失一個紅波,德差瓦淡淡定,打出一Q 63度,最終贏104:1,局數險勝10:9,殺入16強對威爾斯21歲新秀米高韋特,並穩袋至少16,000英鎊獎金(18.9萬港元),真係和味,「賽前我估贏面只有一至兩成,所以我冇畀自己太大壓力,亦好開心觀眾咁支持我,可能係人生嘅第一個世錦賽,所以有咁多掌聲。」
陳國明:佢鍾意講笑
唔少桌球手比賽時喜怒不形於色,偏偏德差瓦就大情大性,識咗佢十幾年嘅前港隊代表陳國明就話:「呢個係德差瓦嘅風格,佢覺得可以減輕壓力。3年前,佢嚟香港都有一齊練波食飯,佢份人好開朗,好鍾意講笑,希望佢16強繼續有好發揮。」