捐，唔捐？唔同市民對撥款賑災有唔同意見，就連公民黨內都有分歧。話說Miss Mo日前喺facebook不點名話：「今晚開會拍枱！支持一億撥款？是甚麼東西圖以公民黨的名義代表我！」嘩、嘩、嘩，邊個激親Miss Mo呀？
當八方想追查之際，Miss Mo已經喺噚日朝早嘅財委會自揭謎底，佢表明反對撥款之後，高叫「陳家洛不代表我！」搞到在席嘅紅花會總舵主好鬼尷尬。知情者話呀，陳家洛日前同記者講過支持一億撥款，連只捐慈善機構呢個限制都冇，因此辣㷫Miss Mo喎。Miss Mo反對一億撥款嘅訊息，原來破晒紀錄獲兩千幾人like。