對中環OL來說，一個價值萬元以上的靚手袋，就等於一個身份象徵。
但手袋用久了，自然會出現這樣那樣的破損磨蝕，棄之可惜，於是專修補手袋的達人應運而生，且各有擅長。
「好多袋只係甩色或甩線，只要將舊袋染成新色，就可以當新袋用」，在中環開店的專業補袋人鄭卓峰，創立一套翻新手袋技術，局部翻新又得，全袋變色亦得。
中環另一處樓上皮具工作坊，則有另一位手袋達人誇下海口，「只要係皮類，幾爛都可以修補，但不會翻新，客人攞得袋嚟整，就係想保存舊有記憶」。
記者：羅鈺歡 攝影：鄧振權
多年來各名店相繼駐紮中環，買名牌手袋的OL亦有增無減。據知當年名牌手袋要維修，都要送往外國原廠跟進，一來一回最少三個月至半年才能修好，而且配件短缺，過時兩年的款色多不接受維修，想長期保存手袋相當麻煩。於是一些人開始找尋本地維修店修理，造就手袋維修業逐漸在中環興起。
漂染換色舊袋變新
手袋達人鄭卓峰透露，手袋常見問題是「四甩」，包括甩線、甩扣、甩窩釘及甩色。前三種最易修理，只要用相同的顏色線或釘縫補就可以。反而甩色最難搞，即使用皮油塗抹好，日子久了又會再甩色，「如果客人唔介意大翻新，將甩色或變黃嘅手袋，用染料浸透成黑色或深啡色，襟睇兼易打理，可多用起碼一年」，鄭卓峰聲稱他獨創的漂染技術，可謂手袋終極救星。
雖然手握秘技，但仍有些手袋他是不會維修的。「好多時太昂貴嘅袋如Hermes嗰啲，當損壞涉及到鈕扣等原裝物料，我哋冇配件都唔會接，廢事孭鍋」。他表示，經他手維修過最貴的手袋價值港幣80萬，但不肯透露品牌，「個袋只係甩咗線，所以可以整，但知佢貴所以好小心」。
保原裝「懷舊」突圍
鄭卓峰一招染色翻新行走江湖，在中環往山頂電梯旁的另一手袋達人溫傃嵐（Jackie），卻以另一招「懷舊」突圍。她原是一位皮具設計師兼導師，經學員及朋友廣傳她的皮革工藝後，反而越來越多人找她醫袋，無論是牛皮、羊皮、鱷魚皮及馬毛皮等，只要是真皮製造，她說再爛都能修補。
她不喜歡翻新，原因是堅信「舊咗就係舊咗，客人攞得畀我整，就係想留住個袋嘅原有懷舊感，我唔會同客人講整完會變新」。她認為翻新只會把手袋變成另一個東西，所以只願意以一個「補」字來拯救，包括補線、補扣，甚至以其他皮革修補，不破壞手袋本來面貌。
「例如有個客攞個斷咗拉鏈嘅Chanel袋嚟整，但螺絲位鎖死咗拆唔到，最後決定成條拉鏈改短，再用近似嘅羊皮蓋過損壞部份，都保持到原樣」。她說最難處理的甩色問題，也叫客人補色，過一段日子甩色後，寧可回來再補色。
女孩重修父母信物
儘管救袋手法各有不同，但兩位手達袋人都同意，每一個手袋，都各有故事。
「個袋咁貴，個個客人攞袋嚟整，唔係話老公送，就係男朋友送，都有紀念價值。其中一個80歲老伯嘅經歷最感動我，佢攞咗兩個鱷魚皮銀包嚟話，『個銀包係我老婆送嘅，已經跟咗我40幾年喇』」。鄭卓峰說，老伯的老婆已經過身，他因此每日睹物思人。「另外有個60幾歲嘅太太，攞個污糟袋嚟整， 佢話係唔想仔女見佢唔用佢哋送嘅袋而失望，所以攞嚟整」。
另外有一個女孩拿來的手袋，也同樣叫Jackie感動，「個女仔攞住個七十年代嘅鱷魚皮手袋嚟畀我整，話係當年爸爸送畀媽媽嘅。父母嘅浪漫，對一家人都好有紀念價值。但一睇就見到成個袋都爆晒線，我惟有拆晒啲線逐條重新縫合」。
大家補的不只是物件，其實還有那些甜蜜回憶。
你想爆？幫你爆！
熱線電話：2990 7225
mailto:[email protected]
WhatsApp：9131 4511