（怒）利物浦前鋒蘇亞雷斯，周日主場打和車路士2:2場英超，突然一口咬埋嘜佢嘅車仔後衞伊雲奴域隻手度，搞到滿城風雨。雖然阿蘇事後即時認錯，仲畀球會罰咗30萬鎊（約357萬港元），但英足總調查事件之後，決定嚴懲，喺周三重罰佢停賽10場！
利記營運總監艾爾回應英足總判決時話感到好失望：「球會同阿蘇對足總獨立紀律委員會嘅重罰，真係感到好驚訝同失望囉。我哋會等英足總有書面解釋，再決定下一步點做。」𠵱家紅軍靠晒阿蘇數糊，唔使睇梗係諗緊會唔會喺周五前上訴博減刑啦。
阿蘇要停10場，即係冇可能同曼聯射手尹佩斯爭今季英超神射手。而佢除咗缺席利物浦今季餘下4場聯賽，下季頭6場聯賽都打唔到，預計要到9月先可以喺本土賽事復出。另外，利物浦剛宣佈會喺8月同陣中忠臣謝拉特搞場紀念賽，喺晏菲路對奧林比亞高斯。而據講謝拉特會喺英超收咧之後，接受肩膀手術，因此代表唔到英格蘭國家隊友賽巴西。