上周末，花旗國傳出聯儲局主席伯南克今年唔會去8月尾嘅Jackson Hole（JH）會議。呢個會係一班經濟學家坐埋傾經濟嘢嘅聚會。點解一個唔去吹水會嘅消息，緊要到孫柏文喺呢度同大家分享？原因係由09年開始嘅救市計劃，到2010年開始冇效。09年推出量化寬鬆，大家諗住係因為非常時期，屬一次性計劃。
點知就喺2010年8月尾嘅JH會議，伯南克就宣佈量寬二期。當時記得港交所（388）賣120幾蚊，而我就繼續由06年開始嘅唱淡方向。當時，我諗住呢啲印鈔活動，根本救唔到經濟體，所以就當量寬二冇料到。點知，全球市場開始飆，到1個月後嘅9月尾，港交所已升到150幾蚊，我就學Keynes凱因斯嗰句「當事實變，我就改睇法，你呢」寫咗篇題為「我投降」嘅文。因為股市卒之同基本因素脫鈎，純粹睇股民感覺，同錢湧入。仲要叫一注獨贏港交所，話喺量寬二期內見200元。當然，後尾唔中，因為港交所只係去到199元就止步。
今次伯南克唔去又有乜啟示呢？禮拜日，我喺facebook話佢老人家唔去係因為將會喺8月尾前宣佈加大現時無限期量寬額度。噚日同張慧敏Son姐、利世民、股榮食晏，餐後講起呢單嘢，利兄話睇落似伯南克會喺JH前擴大量寬，跟住搵繼任人喺JH辯護個政策，等市場覺得聯儲局有政策持續性。
用日圓買白銀仲着數
我深信各央行印鈔，係要㩒各政府每年嘅財政赤字，不過日本𠵱家係印到每年超出赤字量，即會有錢流出。一旦流出，就會令日圓貶值，貴金屬上升。所以提議，現在2,270日圓買一盎斯白銀，因睇日圓跌到落200日圓兌1美元，又睇白銀升到每盎斯120美元，所以目標價係幾年後將會24,000日圓買一盎斯白銀。
孫柏文
獨立股評人
http://facebook.com/shuen
本欄逢周二、四刊出