碧基扮哥帥冇運行
巴塞中堅碧基（右）前晚以新look示人，剃咗個頭，但鬚就冇剪，驟眼睇仲以為係巴塞前主帥、將於今夏上場成拜仁新帥嘅哥迪奧拿喺安聯度踢緊波。小道消息話，碧基無端轉look，係因為佢嘅歌星女友Shakira鍾意男人光頭，不過，光頭似乎帶唔到好運畀佢。
拜仁6將孭牌要醒定
拜仁𠵱家雖然有一隻腳入咗下月25號喺溫布萊舉行嘅歐聯決賽，但陣中有後衞拿姆、丹迪、中場查維馬天尼斯、舒韋恩史迪加、路爾斯古斯達禾同埋前鋒馬里奧高美斯共6個球員，若然呢班人喺下周三作客魯營攞多1面黃牌，就算入到決賽都要坐波監。
森馬辯稱保護多蒙特
拜仁體育總監森馬話，佢哋冇主動發放馬里奧葛斯由多蒙特加盟嘅消息，係唔想影響多蒙特備戰對皇馬。另外，德國傳媒爆葛斯同拜仁簽約4年，底薪加獎金每年有1,000至1,250萬歐元（約1億至1.26億港元），連埋3,700萬歐元嘅轉會費，份約就值成8,700萬歐元。
艾巴無品波掟洛賓
巴塞嘅佐迪艾巴喺89分鐘侵犯完拜仁中場洛賓之後，隨手將個波掟落洛賓塊面度，結果被罰黃牌，仲因累積3黃而踢唔到下周三場次回合。本港前國際球證陳譚新就話，佐迪艾巴呢吓動作係屬於暴力行為，應該攞紅牌，家陣只係領黃算夠運。