（喜）曼聯第20次喺頂級聯賽封王，球會亦啱啱定咗會喺下個月13號，即係紅魔喺最後一場主場比賽日翌日進行勝利巡遊，同曼徹斯特嘅球迷一齊分享勝利喜悅。球隊會坐開篷巴士，喺黃昏由奧脫福球場出發去市中心，確實時間同路線稍後公佈。
紅魔𠵱家開開心心踢埋最後4場聯賽，第一場將會作客出戰阿仙奴，兵工廠屆時會喺賽前列隊鼓掌歡迎曼聯球員入球場，但廠迷就睬你都儍，聲言會喺嗰陣背住球場。另外，上場拎紅牌嘅前鋒基奧特上訴失敗維持停賽3場，換言之佢要到煞科戰先可以再披甲上陣。尹佩斯喺曼聯贏英超，其實阿仙奴都唔使太唔開心，因為根據合約條款，兵工廠可以收多150萬鎊轉會費。