泰國仔德差瓦威到爆，另一位亞洲代表、中國嘅丁俊暉都唔輸蝕，噚日首圈以10:5輕鬆淘汰麥馬拿斯過關，16強對京治。另一熱門鄧立普亦晉級，佢賽後話會捐錢畀四川地震災民。
大熱鄧立普捐錢賑災
第1節領先7:2嘅小丁，第2節繼續戴上黑紗比賽，悼念四川雅安地震嘅死難者，佢初段有少少手緊，被對手連追3局至5:7，令到形勢緊湊起嚟，喺愚人節26歲牛一嘅小丁好快重拾狀態，反而麥馬拿斯失誤越嚟越多；最後小丁連贏3局，局數贏10:5晉級。另一場，京治爆冷10:5擊退世界排名第7嘅艾倫，同小丁喺16強一定會有番惡鬥。
好多球手好關心雅安地震災情，奪標熱門鄧立普，繼小丁同香港嘅傅家俊後，亦要求入場嗰陣，賽會唔好播放配樂，以示尊重；佢首圈10:5擊敗戴奧之後，話會捐錢賑災，「中國係我嘅幸運之地，舊年10月就喺成都贏得國際錦標賽冠軍，我希望集合球員嘅力量，幫助災民。」