麥格理前日出咗份報告，全線唱好頁岩氣股表現，其中由添利工業（093）分拆出嚟嘅百勤油服（2178），成為該行首選，帶動百勤連升兩日，詳細內容可參考噚日〈報告王〉專欄。阿仔連日爆升，但阿媽添利股價竟然郁都唔郁，實在於理不合。現時添利持有百勤3.4億股，以噚日百勤收市價4.83元計，持股市值高達16.4億銀，添利手頭淨現金達4.7億銀，兩者加埋已超出添利總市值（昨日為20.4億銀），集團現時於中山嘅商住及停車場逾四萬平方米物業，點計都唔會一文不值。
根據添利早前所發通告，分拆百勤上市，已錄得約1.3億銀收益，今年盈利已有保證，在手頭現金充裕下，唔排除會再派高息回饋股東。百勤今年3月6日上市，招股價3.28元，短短一個多月股價狂升近五成，期內添利竟大跌19%，背馳情況嚴重。添利昨收報1.04元，升1%，現價係咁易追番百勤一半升幅，可見1.29元，屆時仍較今年高位低逾一成。
唐牛