習近平上場後，話要嚴打貪風、厲行節約，結果搞到內地高檔貨生意吹淡風，事關就算有人敢向京官送厚禮，佢哋都未必敢收！造就中價貨色興起，好似千零二千蚊一隻嘅鐵達時手錶，據講近月銷量強勁，有政界中人話可能因為啲官唔敢再戴貴錶所致，否則變成第二個無錶哥，點算好？
帶旺鐵達時銷情
無錶哥都唔識？Out咗啲喎，咪就係四川雅安蘆山縣委書記范繼躍囉。早前佢陪總理李克強巡視災情時，被網民發現刻意除咗隻21萬人民幣嘅江詩丹頓名錶，有意扮清廉喎。
有政界中人同八方講，內地官員戴十幾廿萬錶嘅日子，俱往矣！據佢所知，香港人近年比較少戴嘅鐵達時手錶，近月喺內地銷量增加咗，唔係因為有乜嘢新款式熱爆，相信因為啲內地官員，喺習近平要求節約下唔敢再戴貴錶，換啲千零二千蚊嘅錶粗粗哋戴住先；若然畀領導見到，都可以扮廉潔，唔使好似無錶哥要除錶咁着迹。
據知向來送慣禮嘅商界中人，見到啲官唔敢戴貴嘢，亦改買中價貨做禮，以免佢哋唔敢收，可能因此帶旺埋鐵達時手錶銷情。唔知有鋪送禮癖嘅前廉政專員湯顯明，會唔會送鐵達時畀內地啲好朋友呢？
http://[email protected]