篋神新秀麗（Samsonite，1910）最近股如其名，過去10個月累升咗68%。就算前大股東私募基金CVC聯同RBS，喺過去不足一年時間內，走夾唔唞地，連禁售期都唔理，連沽四次貨清倉，都無礙篋神股價繼續創新高，最近首季數據仲要靚仔㖭，問你死未。
唔好睇新秀麗咁風光，其實CVC同RBS算執番身彩。07年CVC向RBS舉債，用156億元買下新秀麗後，不久即遇上金融海嘯，篋神財困。當時CVC派出有「黑暗王子」之稱的Tim Parker做CEO，大手執靚盤數，嗱嗱聲2011年拎來香港上市。CVC和RBS在短短兩年間，沽晒合共44.5%的篋神持股，共套現約182億元走人。呢個幅度對PE嚟講，絕對唔算係一個高回報，如此猴急，有無啟示？
王子過去十幾年來，都係幫PE fund打工，以鍊cost聞名，代表作是曾在上任百日之內，喪炒3,500個員工。佢過去工作過的三間公司，在任期內盈利都勁升，但他走後多被併購或拆骨出售，之後表現無從稽考。CVC已全退，作為篋神精神領袖的王子，會否亦功成離開？據講當年王子曾向投資者表示，覺得新秀麗比以前做的公司有趣，打算繼續做。海迪希望王子，說到做到。
海迪