民望不振嘅梁振英政府，噚日失驚無神攞咗梁振英競選特首時個網站名稱，搞咗個叫「家是香港」嘅運動，搵嚟一大班梁粉示範填色遊戲，再砌幅巨型圖畫出來。
恒生銀行前「女大班」梁高美懿噚日都俾政府跣咗鑊，話本來諗住可以自由發揮盡情畫，到場先知只不過係填色遊戲，相當意外咁話。同場仲有「受上帝感召」撐唐唐、及後轉軚挺梁嘅全國政協委員容永祺，佢噚日填色時，比政府原先派落嘅貓紙草圖更「紅」，一度要搵其他顏色溝淡番。
兒童發展基金督導委員會成員、民主黨「大腦」羅致光，話自己唯一肥佬嘅科目就係畫畫，初中之後就冇再畫畫，噚日當然亦唔會獻醜。