利物浦前鋒蘇亞雷斯喺周日再顯「天生咬人狂」本色，咬咗車路士後衞伊雲洛域手臂一啖之後，成為過街老鼠，俾全城圍插。不過，對於「咬人蘇」嚟講，佢最怕嘅唔係俾人插，而係返到屋企老婆蘇菲亞嘅河東獅吼。
阿蘇唔知係牙痕，定抑或原來同吸血殭屍有血緣關係，好鬼鍾意咬人；繼2010年喺阿積士咬對手之後，周日又咬伊雲洛域，今次絕對手尾長；英足總周一就以暴力行為罪名起訴佢，佢可以喺周三英國時間6點前提出上訴，由於佢有前科，睇嚟會被重罰。而受害人伊雲洛域亦唔接受佢嘅道歉。
英首相都關注事件
另外，阿蘇本來打算將被球會罰嘅30萬鎊（約355萬港元）捐畀希斯布祿死難者家屬基金，又被拒絕；就連威爾斯一名小學生亦學阿蘇咬同學；英國首相卡梅倫都出嚟話關注事件，睇嚟阿蘇真係神憎鬼厭。仲有呀，如果阿蘇俾足總起訴嘅罪名成立，好明顯要長期停賽，即係話佢要喺英超射手榜，再過番曼聯嘅尹佩斯做神射手，幾乎係冇可能嘅事。
不過，對阿蘇自己嚟講，人哋點對佢可能都唔重要，佢最怕嘅只係俾老婆蘇菲亞鬧啫！因為阿蘇早前接受訪問時講過：「我老婆對我好嚴格，當我喺球場上表現有閃失，佢會叫我躝。我寧願俾領隊羅渣士鬧，都唔想俾老婆鬧，因為起碼羅渣士都會畀番幾分薄面，用詞小心啲。」
24歲嘅蘇菲亞同2歲嘅囡囡迪芬娜，絕對係阿蘇心目中最重要嘅兩位女性；睇佢周日對車仔場波，就算出咗事，但為利記扳平後，都識得錫婚戒同埋右手手腕（因為嗰度紋咗囡囡個名）就知啦！
阿蘇曾為摯愛棄足球
老生常談：「怕老婆會發達。」蘇亞雷斯其實係太愛老婆蘇菲亞，所以先會「怕」佢。話說當年阿蘇15歲嗰陣，遇到細佢兩年嘅蘇菲亞，就墮入情網；後者03年搬去西班牙巴塞隆拿同家人團聚，令到阿蘇沮喪到一度放棄過足球。不過，呢位烏拉圭國腳之後醒覺，知道成名轉會去歐洲係再見愛人嘅唯一出路後，就踢出彩虹；最終仲如願以償，轉戰荷甲同蘇菲亞團聚。09年兩人拉埋天窗，之後一年就生咗囡囡迪芬娜。蘇菲亞𠵱家不時都會帶埋囡囡入場，為爸爸打氣。