誤食有毒野菇中毒嘅中學教師胡東兵夫婦正在康復階段，胡Sir已經返屋企休養，胡太因換咗肝要繼續留院。胡Sir噚日喺facebook上載咗幾張相，係教育局長吳得掂同政助施俊輝，連同教聯會主席黃均瑜等人，帶埋果籃去胡家探佢，而吳得掂告誡胡Sir以後小心食嘢時，仲好幽默咁拋下一句蝦仔爹哋式爛gag「行山還行山，食晒水果先」㖭呀。
胡Sir容光滿面，睇嚟精神唔錯，又攞出學生寫畀佢哋嘅打氣卡畀局長睇，吳得掂特別讀出幾張留言，包括有學生寫胡Sir「對人好奇怪」，又有學生向佢表白：「你係我最中（鍾）意嘅老師。」