特首梁振英突然宣佈訪京，表面上跟進上次訪問京、津等成果，但官場及政圈人士皆認為，梁「山長水遠」去北京，又豈會只講中、港經濟如此簡單？估計阿爺除有機會問政改、佔中等議題外，也想了解碼頭工潮如何收科。據知阿爺擔心事件尾大不掉，已找人來港「收風」，了解工潮發展及李家的態度。
和黃完全唔騷政府
有官場中人對季陶說，從目前形勢看，工會勝算已越來越低，主要是和黃及李澤鉅態度十分強硬，政府斡旋空間極度有限：「我哋估班工人捱到五．一之後，好快無以為繼，事關高寶又執笠、和黃又企硬唔傾、罷工基金又用得七七八八，工會、工人好難撐落去。」
但話分兩頭，若罷工工人見談判陷於絕望，會否盡地一煲，用更激進行動抗爭？這點誰也不敢保證。而現時亦無法評估市民會否響應工會號召，再出現過萬人包圍政府或長江中心的局面。
阿爺自然不想情況惡化，奈何有知情人士指，政府根本無法動和黃分毫，「據知政府想同和黃傾，但人哋根本唔騷政府，叫政府搵外判商」。據聞和黃的強硬態度，亦已引起阿爺「注意」，想了解李家「係咪淨係因為生意咁簡單？」近日和黃高調賣廣告，直指李卓人、工會有政治目的，有政圈中人笑言，這些廣告不止給香港人看，其實也是給北京看，以示和黃及李家絕非「搞事分子」。
季陶