憑《殘酷一叮》入娛樂圈嘅喬寶寶，因為老婆嘅居留權問題，搞到佢要成家移居英國蘇格蘭，佢老婆已經去咗嗰邊一年，而喬寶寶就會喺下個月8號起程去同家人團聚。
前晚喬寶寶嘅經理人黑妹就為佢喺尖沙嘴搞咗個42歲生日派對兼歡送會，問到生日願望時，喬寶寶就略帶唔開心咁話：「希望家庭幸福啦。」
老婆逾期居英
嚟緊喬寶寶要坐成三年移民監，佢話：「自己本來計劃9月走，同當地律師講，老婆𠵱家留係當地係逾期居留，𠵱家係人道理由留低，我5月中會過去見移民官，自己喺香港嘅經營生意都退咗股，拎番晒現金，因為去到當地都唔知乜嘢世界。我早兩年已喺嗰邊開咗間中印菜餐廳，收入穩定，但唔似喺香港搵到大錢。」喬寶寶透露8月會返嚟香港工作。
而有份到場嘅古明華（蘇基）同喬寶寶合照時，仲送上一吻，好用力咁啜喬寶寶臉珠㖭，蘇基送咗件萬用衫畀佢，又話：「佢好nice，好鹹濕，平日一齊食嘢，好高興佢有新方向，喺當地做自己鍾意嘅事，亦都祝福佢快啲回港，佢份人好啱香港娛樂圈。」
撰文：馮仁昭
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/