做過保安局局長嘅新民黨葉劉淑儀，噚日同其他6位行會成員去咗灣仔警察總部，參觀警方新成立嘅網絡安全中心，一哥曾偉雄親自接待。
中心專責保障網絡安全、以及分析同追蹤網絡攻擊，葉太話保安理由起見，唔講得入面有乜嘢hi-tech設施，但透露呢個隸屬商業罪案調查科科技罪案組嘅中心，去年12月成立，成員一共有27人，由1名總督察統領。葉太話外國嘅網絡安全中心係重要部門，通常直接由首相及政府主要部門統領，咁講法，唔通嫌香港嘅中心太低規格？葉太話網絡安全好重要，港交所、航空系統等運作都靠晒網絡，覺得有個中心睇住，穩陣好多。