殼王陳國強入主電視廣播（511）幾年，表面上冇太大改變，但其實唔覺唔覺都有好多嘢變咗。好似一年一度嘅股東會，TVB以往多數喺尖東一間老牌酒店舉行，舊年已經換咗另一間酒店，今年直情唔幫襯酒店，首次喺自己主場將軍澳電視城舉行。班股東可以順便感受吓堆填區係咪咁心曠神怡，一舉兩得！
讚自己業務獨特
TVB舊年賺逾17億元，照計唔使慳呢筆錢，要班股東山長水遠走入堆填區開股東會吖。TVB方面解釋，首次喺電視城搞股東會，唔係為慳錢，而係董事認為TVB業務獨特，希望藉住下月22號舉行嘅股東會，畀班股東感受吓電視城係乜嘢一回事。
股東會暫定喺其中一個錄影廠舉行，公司亦會安排接駁車，接送股東往來附近港鐵站同電視城。唔知TVB到時會唔會安排幾位小生、花旦扮路過，好似黎耀祥、陳豪咁，畀股東同佢哋合照，高興吓呢？