市況又陷入好似去年第二季時的膠着狀態，芬佬朋友普遍認為港股大致已跌定，最多殺埋一批牛證，似乎差不多可鳴金收兵。但你說要回升咩？又暫時睇唔到有甚麼catalyst。平均成交額又跌返去500幾億元境況，一個字講晒：悶！
至於投行裁員風潮，最近又再加大力度，幾乎每兩、三日就會聽到某某行裁咗幾件，而且多數是業務類型屬於maintenance部門。有分析員朋友形容，𠵱家啲行家都冇嘢做，一條team原本4個炒剩1個，再請番個剛入行的妹妹幫手執頭執尾，基本上形同一人跟超過20幾30隻股份，好難再要求有乜質素可言。
買賣兩閒，經紀當然呻慘，他們形容為雞肋的夜期沒甚麼幫助，一來佣又低，二來要承擔的風險相對日間高得多，分分鐘夜晚市況動盪要斬倉時搵唔到個客，真係唔知點算。仲有新股呢？君不見中煉化上市集資200餘億元，一共要出動12間投行做承銷，即係話你聽好賣極都有限。去年已有不少賓架紛紛離場，轉泊番個大碼頭上岸，如利豐（494）、太古（019），專做投資控股的周大福企業等，都有賓架加盟。業界前景仍然黯淡，呢一轉洗牌唔知又要捱到幾時。
海迪