還記得李寧（2331）今年初發完盈警後，就宣佈以罕有方式，大折讓發換股證集資最多18.7億元，引來市場好多批評，指其大玩財技，對小股東好唔公平；加上，去年業績第一次「見紅」，勁蝕近廿億人民幣。股價由年初最高約7元水平，跌到𠵱家得番4.12元，蒸發超過四成。
瑞信指估值貴絕同業
睇技術走勢，STC雖率先響起見底訊號，但RSI同MACD都仲未有聲氣，仲係尋底格局。不過，千萬唔好以為跌咁多就可以博反彈，瑞信話就算李寧完成集資，短期內唔使驚冇水，不過都唔保證基本業務可以轉強，皆因李寧目前只係嘗試轉型，兼推行「渠道復興計劃」，究竟能唔能夠扭轉劣勢，仍屬未知數。
最緊要係內地體育品市場戰況激烈，唔係執笠，就係忙於清貨，昔日盛世難再。但六隻香港上市嘅體育股中，瑞信指不論係PE定PB，李寧都係行業之冠，估值實在太貴，預計今年業績會繼續「見紅」，蝕近4億人仔，股價仲可以碌低近三成，一於3蚊見。
另一方面，據彭博數據統計，超過七成大行都叫沽李寧，只有唔夠一成叫買，好明顯，大家一致唔太睇好。當中，摩通唔單止叫人減持，出手比瑞信仲狠，目標價2.20元，較現價仲有近五成跌幅，果然低處未算低。
瑪姬兒