免費資訊多，傳媒競爭大，不過唔代表冇得撈。總結觀察所得，要奪取市場芳心，一定要「秒秒金」。菲菲留意到，上月創刊嘅雜誌《100毛》，出咗七期就已升呢。由最初放喺便利店雜誌架底層深處，到最近改放喺最當眼位置；揭一揭內頁，仲開始出現知名品牌嘅廣告。
《100毛》美其名係雜誌，但個人認為以「Gag書」形容最貼切，好似將陳山聰包裝成筍盤BB、將銀行職員口嗰句翻譯成心聲表（根據個表，「有咩可以幫到您？」嘅潛台詞係「又乜×嘢呀？」），令唔少人睇完爆笑，之後期期買書。
雜誌成功用幽默俘虜人10蚊，最重要係佢少數字，每期100條話題，每篇大約200幾字，令人人練成一目十行，睇完、笑完、收工。
菲菲坐地鐵，見後生仔好多時睇嘅唔係fb而係instagram；而由港仔創立嘅9Gag網，憑喪post搞笑圖片，就令網站市值達1.4億銀。
咁就證明，想靠賣資訊發圍，最重要係要練成「秒殺」讀者秘技。
Fifi
本欄逢周二、四刊出