唔知道由幾時開始，很多高官貴人都會用自己做例子，但真係唔係個個都可以好似奧巴馬咁，用自己大學時申請貸款的個案，成功打動美國數以十萬計的大學生。而反面教材則俯拾皆是，前有中產財爺，現是打工皇帝。佢上周六現身北京，主動會見記者，並為拖延多日的貨櫃碼頭工潮表態。
不過從頭到尾就係炮轟工人和工會，仲大大聲咁話︰「我個仔日日做工做20個小時，點解呢？你估有人逼佢做咩？佢自己做咋嘛。」表面聽落好有道理，不過請問令公子每天（我估全意應係每（月有幾）天）工作20小時，收入係工人所得嘅幾多十倍呢？仲有佢使唔使喺頂級辦公室裏面（我講緊嘅唔係洗手間）大小便呀？
搵食艱難 與我何干
工人連續長時間工作，連生理需要都要就地解決，這當然不是被迫，而是自願，但點解咁辛苦都要做？因為他們都知道唔做，就以後都唔使做，一句講晒，搵食艱難。咁簡單的道理，皇帝點會唔明白，只係對佢嚟講：「與我何干？」所以佢嘅言詞，只係令普羅市民更加清楚知道，原來你根本唔會，亦唔識體恤工人，以至民生疾苦，先有我個仔有時都冇得食肉糜之言。
佢仲話，旗下嘅「瘋窒」、「趴街」樣樣又平又靚又正喎，或者佢以為自己唔只身為皇帝，仲做埋「視帝」，收咗錢要「幫你日日賺」嗰份。不過超市生意，確在民眾教育方面貢獻良多，起碼求其問一個C9，家陣都識得分「油魚」同「鱈魚」。至於「瘋窒」電器質素有幾好，我就唔知，不過就知早前貴號員工扣起晒嘅熱銷手機賣畀水貨客。一句廣告用語，皇帝竟順口回應照讀，可見認真程度。
工會開出兩成的加薪幅度，佢話會影響經濟，且會拖垮百業。試問李氏家族旗下樓盤開賣時，已成定律的唧牙膏式加價，再者動輒唔止兩成的商務租金加幅，點解反成了經濟繁榮的應有之象？況且閣下的「市」價薪金，都係每年拾級而上，幅度遠遠高於工人要求的兩成，以此為準，工人的要求不是無中生有，更不是你口中的唔合理，同埋係唔想有結果的訴求。
還有四天，貨櫃碼頭工潮已經持續一個月，今次罷工能夠維持咁耐，真係多得資方多番火上加油，以及庸碌無能的特區政府。罷工初期，那位「謝利仔」出位的言論已為這工潮投下了火藥，皇帝今番護主情切，眼見主子總部以至家宅被圍，因此主動出擊，豈料言論更惹人反感。點止公關危機，直情公關災難。還有，特區政府在這場工潮的角色就更令人氣憤，「建宗」完全不「見蹤」，再蒲頭都係一副無能為力袖手旁觀的樣子，睇見政府這一副虛應hea做的德性，又一次話畀我哋知：「政府靠得住，乜嘢都會上樹。」
盧先亞