上周末上海舉辦第15屆汽車展，比亞迪（1211）同德國平治汽車嘅聯營公司Denza騰勢，展出佢哋第一部以平治B Class平台做嘅車。當年呢間騰勢嘅出現，應該係比亞迪同電動車概念嘅頂峯。
當時先有畢菲特旗下公司入股，再有火燎森一注獨贏咁跟買，之後有平治合作，勢頭一時無兩，股價升幅以倍數計。時隔不久，先有畢菲特炒咗決定買比亞迪嗰個員工，火燎森〈300萬爽組合〉出局，同平治喺深圳嘅員工開始有微言。
到上周，路透社忽然報道，比亞迪有兩個冇開名嘅高層，話比亞迪會喺三年內放棄汽油車。大家聽到，可能會話好事，因為專注喺佢殺食嘅電動車身上。可能就係咁，喺報道出街後股價升超過一成。
不過，火燎森就話如果比亞迪真係咁做，就有如自殺。無他，因為火兄係會計出身，一睇比亞迪盤數，就見佢哋得汽油車賺錢，電動車業務有如焚化爐般燒錢。
兩日前，比亞迪出律師信畀路透社，要路透社收回比亞迪覺得錯嘅報道。路透社收律師信後企硬，話唔會收回。路透社企到咁硬，可能因為呢個係行內頂級跑汽車業新聞嘅記者，即係可信性極高，有可能比亞迪喺不久嘅將來，會宣佈停止製造汽油車。
三年目標價7元
孫柏文作為石油前分析員，覺得「另類能源」唔係風電、太陽能，而係油砂、頁岩氣。電動車有過百年歷史，一路未能變主流，係因為代替品，即汽油車太有競爭力。呢個係三數年內，都唔會變嘅事實。而如果比亞迪繼續製造汽油車，你覺係佢嘅強項咩？啲人會繼續買佢嘅產品而唔係幫襯其他車廠？
佢最近半年由低位12.54元反彈一倍到差不多26蚊，市盈率近700倍。我今日就定三年目標價7元，比現價低逾七成。一注獨沽比亞迪！
孫柏文
獨立股評人
http://facebook.com/shuen
本欄逢周二、四刊出