零星挾倉行動持續，長汽（2333）銷售爆升，帶挈汽車股齊爆上，連積弱多月、基本因素欠奉的汽車代理股都升，其實有點過火。最弱勢股份都炒，一般預示挾倉已近尾聲，在魚缸嚴重缺水下，相信大市會呆到月尾，下個月再sell in May。
呢幾日唔少戰友在facebook問魏力，有乜股可以追落後。其實短炒反彈，都要開市睇邊個板塊起動再決定，當趨勢形成，一般已升4%至5%，在如此淡市下仲有幾多值博率？買定等炒係較好的做法，但坐了兩日都唔炒又點算？點計其實都唔化算。相反，買中幾隻強勢股，如金山軟件（3888）、四環醫藥（460）、光大國際（257）及精電（710），基本因素好，坐得舒服，回報亦相當不俗。
中資股季績期殺到，魏力心水是華能國際（902）。受惠煤價低迷，電力股燃料成本續跌，電價適度上調，毛利率今年仍有擴闊空間。彭博綜合預測PE仍是10倍左右，息率近5厘，加上去年業績理想，負債比率降至220%，遠低於大唐發電（991）及華電國際（1071），可說是季績穩膽。
走勢上，近半年華能一直沿50日線而上，可謂無懈可擊，昨炒高4%，收8.37元，似為破頂作好準備，中線可博見10蚊。
魏力
http://www.facebook.com/2012jason
本欄逢周一、二、四、五刊出