國際貨櫃碼頭（HIT）外判工人發起嘅工潮持續，HIT母公司和黃（013）董事總經理霍建寧上周六喺北京開腔，嚴詞批評職工盟秘書長李卓人想做佢哋世界。從電視畫面，睇到霍建寧呢位年薪過億、護主心切嘅打工皇帝，鬧到七情上面，肉緊到差啲面容扭曲。
再睇清楚啲，發現霍建寧竟然出現「男人最痛」──頭髮稀疏。霍建寧一向算係頭髮濃密，上月底出席長實（001）、和黃業績記者會，仲將以往一頭灰白髮染黑，成個人睇落後生十年。點解一個月後再蒲頭，黑髮喺度，頭頂嘅煩惱絲望落稀疏咗嘅？唔通佢呢個月不斷諗計擺平工潮，諗到頴甩頭髮？還是染髮劑有問題？