話係《超級巨聲》藝員版嘅《星夢傳奇》噚日喺電視城進行一連三日嘅面試，呢個畀無綫全台藝員參加嘅歌唱比賽，聽聞吸引咗一半藝員參加，仲有傳話被力捧嘅蕭正楠、梁烈唯唔使試音。
噚日下晝3點，鬼妹陳明恩、林子博、麥嘉倫、「嘉明」張景淳、郭田葰等嚟咗試音，擔任評判嘅就有高層陳家揚同監製麥鎮東等四人。講到有指蕭正楠唔使試音自動入圍，陳家揚講明所有藝員都要試音，每日大約會見五十人，咁有幾多人會入選？陳家揚話：「聽晒所有人再決定。」有指全台藝員會一齊錄呢個節目嘅主題曲，佢話有諗過但未決定。
巨聲幫冇得參加
商天娥之前喺張國榮個紀念騷中唱得咁正，參加肯定名列前茅啦，但唔喺香港嘅娥姐透過WhatsApp話佢唔知有呢個比賽，而且呢排經常唔喺香港，冇諗過參加。曾經出過唱片嘅鬼妹陳明恩表現好緊張，佢話：「藝人應該畀自己更多挑戰。」
娛樂新聞台記者林子博唱張學友嘅《愛是永恆》嚟試咪，佢話聽聞一班巨聲幫唔可以參加，而佢就喺囡囡支持下嚟參賽，綠葉麥嘉倫對於蕭正楠呢啲唱得之人都可參加，覺得冇乜所謂。
撰文：馮仁昭
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/