財爺曾俊華噚日出席路訊通(888)舉辦嘅《香港走出去》節目啟播禮,大會先默哀一分鐘,以悼念四川七級地震死者。佢亦乘機話吓個別立法會議員,計劃本周三立法會討論財政預算案時拉布,令佢暫時無法落實外訪時間表,暗示阻住佢幫香港走出去。
為咗襯番「走出去」呢個主題,財爺致辭時話,自己積極帶隊外訪,為港商拓展新市場商機,幫本港企業走出去。
想帶隊外訪搵商機
佢計劃完成財政預算案嘅工作之後,帶本港工商同專業界代表,前往柬埔寨同緬甸考察。但面對有立法會議員講明要拉布,佢對呢次出訪嘅時間冇乜把握,好無奈咁話「暫時唔清楚幾時」。
查實財爺唔使出口術住,立法會主席曾鈺成已經出招,雖批准逾700項主要嚟自人民力量同社民連嘅修訂案,但表明會將佢哋合併為200多項辯論,又唔排除剪布喎。