四川雅安大地震，在重建概念下，水泥鋼鐵股齊齊炒上，重建概念第二梯隊嘅玻璃股，相信好快接力，又以龍頭信義玻璃（868）最值得留意。
信義受惠玻璃價格回升，去年全年賺11.9億銀，按年減少6.1%，跌幅較上半年嘅43.4%大為收窄，下半年盈利更較上半年增近五成。除了食正重建概念，內地城鎮化及保障房建設全速進行，信義產品需求肯定有增無減。另一方面，長城汽車（2333）自爆旗下「哈佛」SUV首季銷量大增92%，帶動車股造好，兼營汽車玻璃嘅信義，又多一個炒作賣點。集團最近頻頻回購，作價介乎5.14至5.51元，翻查對上一次回購為2010年9月，當時5蚊唔夠，結果八個月後炒到上接近10蚊，回購威力不言而喻。信義早前重提分拆太陽能業務上市，一旦成事，公司價值將進一步釋放。
信義昨收報5.44元，升0.93%，10日線剛升穿50日線，發出黃金交叉利好訊號，現價買入，短線先睇六蚊。
唐牛