朋友，相知相交，可共患難。心照不宣，在適當的時候陪笑陪哭。謝霆鋒和陳奕迅（Eason）在競爭激烈的娛樂圈中成好友，變「迅鋒兄弟」。二人不同唱片公司，曾一起扮日本女子組合Puffy上節目，又以黑白雙煞打扮出席頒獎禮。私底下，霆鋒和Eason各自成家立室，見證霆鋒經歷婚姻失敗，變回鑽石王老五。二人早前接受商台叱咤903晚上9時至11時新時段節目《雲妮鍾情》訪問，在霆鋒家暢談，一連五集自今日播出，細訴共同經歷不同歲月。
雲：雲妮 迅：陳奕迅 鋒：謝霆鋒
雲：你哋關係好好，好相愛。
迅、鋒：我哋冇競爭。
迅：佢細我六年，但佢喺度我好安心，諗嘢成熟過我。佢講嘢好似好cool，但其實好sweet。
雲：過去一年，霆鋒研究廚藝。有總廚水準，點解突然咁樣？
鋒：我食嘢好多時會批評人，挑釁人但反省自己做唔做到，於是模仿吓做，因此我同阿媽距離拉近多咗話題。
雲：阿臣（Eason）喺你心目中係咪100分歌手？
鋒：係，佢唔到位我會講。當年跟戴思聰老師去睇歌唱比賽，佢唱《望月》，覺得佢唔簡單，但佢（戴思聰）話見到個細路個樣好寸，唱完想兜巴打。
雲：𠵱家仲有冇寫歌、練結他？
鋒：冇彈結他，手指斷咗唔可能再彈。
迅：後來有次同佢做友台音樂會，佢拎咗吹氣結他上台，係咁扑，幾咁可愛。佢真係長大嘞，結他唔係用嚟扑爛，幽自己一默。
鋒：我會一塊塊碎收起，齊整幫佢安葬。
讚栢芝盡責湊囝囝
雲：作為爸爸，點形容自己？
鋒：阿臣好感性，佢會打畀我阿媽，咁多年佢體貼過我對自己父母，佢會提點我幾時同我阿妹傾偈。有時會提我打（電話）先，之後佢先打，唔想截我糊。呢啲我參考、了解多啲，我係要做多啲。對囝囝、父母會平衡啲。
雲：囝囝都係單親家庭，你點handle得好啲？
鋒：最重要係同Cecil（張栢芝）嘅默契，知佢係好盡責帶兩個好健康嘅小朋友。見佢哋健康，睇佢哋開唔開心，就知有冇得到關懷。唔信佢哋會做到一啲嘢令我睇唔出，冇得呃，所以我放心。
雲：囝囝會唔會主動要搵你？
鋒：佢哋仲細，個主動會留畀媽咪。
雲：有冇為仔女擔心？
鋒：有，我係離咗婚，唔喺佢哋身邊，病嘅時候（指兒子），會同Cecil溝通好。
Eason承認自大貪靚
雲：阿臣經常出外，咁點算？
迅：有guilty，太太無微不至我唔使擔心。囡囡生性，又懂事。
雲：如果你哋係一男一女，你哋會否相愛？
鋒：唔得，太有默契冇咗神秘幻想，我同佢嘅激情應該好快燃燒完。
雲：你哋形容吓自己係點。
鋒：我多心又貪心，好無聊發好多白日夢，但幾有定力、自制力，但冇恒心，好矛盾，總覺得做得唔夠好。
迅：我非常簡單，自大、貪靚但懶、腿粗如豐收嘅蘿蔔，今日着條褲，等𨋢會照鏡，明白髮線幾高，個人敏感。
雲：分開後，係咪變咗好多？
鋒：同Cecil？有，起碼同阿臣見番咁多。
迅：佢成熟咗好多。梁家輝曾話我隨波逐流，霆鋒係一個壞學生，你係好學生，壞學生一向攞零雞蛋，攞50分人哋會覺進步好多。大家一向期望你攞100分，所以你仲艱難過霆鋒。
鋒：出道得大家嘅噓聲，前輩、阿臣一個眼神、點頭、搭一搭手鼓勵。另一次做叱咤騷，我唱《曝光》，飛埋嚟嘅汽水罐同埋膠樽，我避得好辛苦。𠵱家跳到幾多樓，係多謝你哋畀過我呢啲。唱十幾分鐘專注望，避到幾多汽水罐同螢光棒。
「唔會糾纏喺個結太耐」
雲：你哋互相講吓對方。
鋒：佢係好歌手，上台嗰刻無啦啦下面死人冧樓佢都唔理，呢啲我做唔到，我有習慣要顧螢光棒嘅距離，好知道發生緊乜事。如果有機關冇郁我都唔會踩上去，我相信佢會，一定跌死。
迅：霆鋒以前會係賺一億之後自殺嗰種人，𠵱家佢會驚，有後代，只會look forward！
雲：今年霆鋒係咪最開心？
鋒：唔係話最開心，性格上有正面轉變，同畀自己壓力搵緊個平衡。
雲：因為婚姻經歷？
鋒：唔係。到咗某個歲數會轉變，唔會再糾纏喺一個結太耐，尤其呢個月同呢位兄台相處吓，開始識relax！
迅：佢結婚、離婚，我哋都係睇報紙知。
雲：總結畀對方一句說話。
迅：希望再見佢喺舞台上唱歌。
鋒：噚日佢問我幾時停落嚟，我哋唔識停，但做完呢個訪問，我會講阿臣你唔停得，因為我哋需要呢種靈魂令我哋過得快樂啲。
撰文：王連連
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/