傳MSCI將會納入A股入新興市場指數，一旦屬實，估計會令基金追買A股，刺激A股上升。不過，實情係外資買A股嘅QFII（合資格境外機構投資者）額度有限，MSCI要納入A股、基金要追買，都牽涉外滙管理嘅技術問題，照計中證監話唔到事，點都要同外管局一齊傾，唔係咁簡單，所以晉佳憧憬唔太大。
但消息就刺激港股上周五急升501點，雖然晉佳唔信中資股會因為MSCI單嘢變番跑贏大市，但絕對認為港股有條件反彈，不過未來繼續要嚴選優質股，好過亂追超賣股。
晉佳開始留意被唾棄好耐嘅鋼鐵股，點解？一嚟基本因素衰到無可再衰，二嚟長遠可能有回春嘅條件。睇番鞍鋼（347），𠵱家市賬率0.6倍，馬鋼（323）就0.5倍，如果計二三線股，真係冇嘢夠佢哋平。
衰無可衰 有望回春
鋼鐵股主要需求來自房地產、基建同各項工業，其中鞍鋼產品瓣數較廣，涉及汽車、造船同家電，馬鋼較集中建築方面，但去到呢個時勢，基本上分別不大，因為需求好唔好，鋼鐵價高唔高，其實都係比鐵礦石價格挾死，所以近幾年鋼鐵股蝕多過賺。
鐵礦石價格高企，可歸咎胡溫政權喺資源外交做得太樣衰，每次同外面傾鐵礦石合同都俾人開天殺價，想收購海外資源最終都慘淡收場，最大嘅受害者自然係鋼鐵孖寶。
習近平上場後，不但即時周圍飛，跟唔同國家打交道，且以王者身份出巡，成功向其他國家頴「保護費」，呢啲「保護費」唔少同資源貿易有關，例如去俄羅斯，就傾掂10年都搞唔掂嘅天然氣供應合約。雖然同鋼鐵股冇關，但習總擺出姿態，要喺資源外交贏番一仗，長遠有可能為經年被欺凌嘅內地鋼鐵行業帶嚟一線曙光。
呢線曙光，好明顯未反映喺股價，但事實上，呢刻去買時間上亦可能早咗啲。不過，如果一定要為買股票設定三、五、七年嘅持股期限，我就會揀鋼鐵股，至少衰無可衰，贏則可以大贏。
晉佳
本欄逢周一、三及五刊出