上周五有三大好消息連珠炮發，包括MSCI擬納入A股、RQFII額度重啟審批，以及人仔滙率傳出再擴大波幅，恒指越升越有，埋單炒高501點，重上22000關，股民如中三重彩，齊齊收錢。最重要係中證監新聞發言人亦承認，正與MSCI在內嘅指數編製公司交流，證明唔係冇米粥，相信中資股短期可重拾雄風。
券商股炒到飛起，連日築底嘅內房股亦一湧而上，合景泰富（1813）上周五升7.4%，突破5元阻力之餘，成交更創逾一年新高，升勢有餘未盡。集團3月預售金額達15.3億銀人仔，按月及按年分別增加35%及48%；首季銷售額更突破40億人仔，按年升近一倍，強到無倫。
在限價唔限量嘅情況下，內房股要賺錢，依然話咁易，從合景泰富強勁銷售可見一斑。現價市盈率唔夠5倍，較過去五年平均嘅12.4倍，大幅折讓六成，加上Beta值達1.8，股價肯定食正今趟搶貨潮，係咁易以6倍PE作目標，亦可見6.20元，潛在升幅23%。
唐牛