唔少品牌搵名星做代言人谷人氣同銷量，好似蠟筆小新食品（1262）早排拎300萬人仔搵楊冪賣奶，聽聞賣床上用品嘅卡撒天嬌（2223），想過搵一位影帝做代言人，點知對方獅子開大口，仲講明唔上床，咁即係等於陳豪唔拎咖啡賣咖啡，卡撒天嬌惟有放棄。
賣床上用品嘅公司通常搵女性做代言人，卡撒天嬌管理層卻別出心裁，想搵影帝，可能諗住型男可以迷倒一班師奶，買多幾套床單枕袋。
點知不問尤自可，一問，對方開價2,000萬元，仲講明唔着睡衣，唔上床。前者都算，唔上床點賣床單被袋呢？唔通齋企喺床邊？或者呢位影帝根本唔想接呢個工作，故意開出辛辣條件，想公司知難而退。管理層計過數，認為如果拎2,000萬元出來搞買一送一宣傳，去貨仲快，何必高價請代言人。