內地有隻A股向股東送避孕套，恒基地產（012）亦有套送，不過此套不同彼套，恒地只係送「飛套」，呢個套，用嚟按一年12個月擺放節目門票，意念嚟自恒地主席李兆基嘅左右手，即係副主席林高演。
港大李兆基會議中心今年初落成，據聞，林高演幫四叔諗送乜嘢紀念品時，認為平時送親紀念品，唔係筆就係簿之類，好悶，想送啲特別嘢。考慮到呢個會議中心集大會堂、多用途演講廳同課室於一身，佢又收過類似嘅飛套，於是決定整800個飛套做紀念品。四叔又千叮萬囑恒地大公關，預留部份送畀傳媒，華華近日就收到幾個。
四叔建議向政府捐出新界農地，等政府可以起樓方便年輕人上車，以香港講緊地產霸權嚟講，佢呢個建議都算破天荒。老闆咁出位，左右手當然有諗頭，整個紀念品都寧舍有計。