趙世曾一直唔贊成個女趙式芝（GiGi）同波爾錶太子女楊如芯（Sean）結婚，前晚佢哋三人前後腳去咗尖沙嘴欣賞音樂劇《辣身舞》。GiGi同Sean晚上7點40分抵達，GiGi話知爸爸會嚟，問怕唔怕見面尷尬？GiGi略帶猶豫話：「唔知呢？OK啩！」睇嚟佢都係想博一鋪！GiGi話香港細，總有機會同場，問幾時正式約見面？佢話：「有機會，但快嘞。」
新女伴只係秘書
唔知係咪夾定？大約15分鐘後，趙世曾先同新女伴到場，佢話呢位女士唔係女友，只係內地秘書孫小姐。問佢係咪同Sean一齊坐？趙世曾好抗拒咁話：「大會安排，應該唔會啩。」若GiGi安排三人飯局會唔會出席？佢話：「唔係吖嘛？」未接受到？「我唔識佢喎，招婿都要問番GiGi啦，又唔係我招。」
事後記者打番電話畀GiGi，佢話同阿爸分開坐，但大家有打招呼，佢話：「其實唔係第一次見，關係好咗啲，兩個都有啲怕醜冇傾偈。」
同場嘅余安安透露大女身在英國，細女則喺美國，雖然擔心當地治安差，但啲女鍾意冇辦法，問佢會唔會叫個女買支槍傍身？佢話：「小朋友點可以有槍，好反對。」
撰文：馮仁昭
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/