社會仇富，照計應該造就越來越多球迷，因為只有球場最易出現以小博大、爆冷、反底嘅場面。雖然，最多球迷捧嘅球隊始終係有錢佬球隊。
有人話仇富係近年先出現嘅社會問題，查實響球場上類似歧視情況一早就有，不過係縮細咗響球員身上。同NBA唔同，響足球場上大家對細細粒嘅球員有一種迷戀，越細粒越好波的話，代表呢個球員越神奇，古有老馬今有美斯近有山度士，當球場外個個爸爸媽媽每日都在比較誰家小孩更高大時，球場內的小巨人其實係非常古怪嘅，而響多年睇波嘅記憶之中，球證先生們亦有呢種唔覺意嘅歧視，明明兩位仁兄五五波炒埋一碟，10次有9次都會係吹罰高大啲嗰位，可能鋤強扶弱係每個人心裏面嘅共同信念吧，搞到班高大佬成日要哭喪咁樣同球證伸冤，鬼叫你阿媽生得你咁高咁大咩。
史上最不幸嘅高佬，首推人如其名嘅真高拿，我真心覺得佢斯文到有啲女人型，但每次對手一擒上佢背脊，球證就吹罰佢，百試百靈。近排嘅苦主就首推安祖卡路爾，我不嬲覺得佢雄赳赳，直到見得多佢苦瓜乾咁同球證𠵱𠵱哦哦時，真係覺得佢幼稚過3歲細路哥，對曼聯佢攞咗面黃牌，原因並唔係費爵爺話齋嘅撞人，而係口水太多，球證都嫌你煩。
仇富嘅朋友若果有日變咗有錢佬會點呢？我擔心緊，事緣最近睇韋斯咸嘅未來大計，佢哋個奧運球場將會響2016年入伙，到時座位稍為增加到5萬4，比𠵱家多咗兩萬啫！水漲船高，預計各方面嘅贊助同收入都會倍增，搞到兩位老細已經話要收購一啲一級球星，襯番球隊嘅upgrade計劃。
佢哋happy係有理由嘅，因為英超近年已經試過好多次換個新球場，就順手換個新老闆，新老闆就將隊波由本地品牌變做國際品牌，從此脫貧成功。之但係若果有呢一日嘅話，以往深夜陪伴我嘅以小博大，偷雞失敗、死守完場嘅難忘抗爭經歷咪冇晒？大嚿就一定係衰嘅咩？唔知，但係辛苦得來嘅成果，永遠比擘大口就有得食有益得多，富者越富嘅故事現實生活已經太多，我哋需要嘅，係小市民嘅反底故事。
keyman
now TV主持
mailto:[email protected]