說到內地高爾夫球場，很多人只知道觀瀾湖。第二代朱鼎健接棒後，看似一步步執行父親朱樹豪生前未竟的高球宏願，但其實他早已起革命；偏離高爾夫球會近20年的發展軌道，朱鼎健夥拍多個品牌轉攻旅遊度假，向數個地方政府的項目說不，他的「反叛」當年激到老父在眾目睽睽下，狠狠摑了他一巴。
記者：李芳芳 攝影：程志遠
「佢覺得我唔聽佢講，佢坐喺度，叫我行過去，佢即刻起身摑咗我一巴，當住好多同事面前……當然我好唔開心啦。」朱鼎健憶起父親離世前不久，他與團隊到醫院向其彙報海口項目遇上問題，因不接受父親提出的解決方案，引發二人一生中最激烈的衝突。但他談起此事時情緒沒有絲毫波動，反而嘴角上揚，將矛盾歸咎於自己報喜不報憂，「佢唔知件事嘅全貌，作出錯誤嘅決定係合理。我吞咗啖氣，過咗兩個鐘頭，入去同佢和解」。
被父親當眾摑一巴掌
朱鼎健說，早期父親為擴張觀瀾湖至其他城市，已與多個地方政府有前期接觸，但當簽定海口觀瀾湖合約，他卻確診末期癌症，最後兩年都要在醫院度過，不能再走在第一線。「佢捉住我隻手，叫我幫佢完成呢個夢……佢喺醫院嗰時仍然好勇㗎，仲會諗點樣發展，去到邊個城市。但當時正值金融海嘯，我必須要守，覺得一定要先顧好海口項目，唔可以遍地開花。到最後佢都係堅持要我去開發，但我選擇唔開發，而且清楚同對方講唔做」。
為盡快繼承父業，朱鼎健用兩年完成在加拿大的四年大學課程，21歲加入公司時，深圳觀瀾湖剛剛建成啟業。他緊緊閉目十秒，努力在腦海搜索片段逾4分鐘，才發覺自己第一次「反叛」時已經36歲，「佢出手打我，肯定係代表我反叛啦」。
盡孝道拒變純地產商
為讓父親安心，他送上觀瀾湖第五個五年的計劃書，這份最後的禮物列出高球、地產和綜合休閒三個產業的指標追求，包括五年內增加五個觀瀾湖。「從深圳、東莞到海口觀瀾湖，爸爸以前嘅作風一定係要獨資做晒。我有寫會發展邊啲項目，實現佢嘅心願，但冇講到用乜手法去實現，最後我選擇同合作夥伴去發展，利用槓桿效應，立竿見影。日後發展嘅觀瀾湖都唔一定獨資，可以同人合作，或者接管物業形式管理」。
事業從地產開發開始的朱鼎健，明確表示日後不會轉向純地產發展的項目「作為爸爸嘅繼承人，如果我賣咗呢盤生意，等於我唔係一個孝子。觀瀾湖唔會依賴地產，反而應該迎合社會消費習慣變化，結合更多元素，從中搵出未來之道路……我亦唔會畀『守業更難』呢句話綑綁我嘅發揮。爸爸畀咗我一個機會，我今日最大嘅目標唔係同爸爸做任何比較，而係幫佢爭光，等社會認同佢係一個好父親。」他今年跟隨父親步伐，當選全國政協委員。
朱鼎健不樂於被標籤為「富二代」，22歲與初戀女友結婚，至今已育有三個女兒，他的生活基本圍繞工作、運動和家庭，名副其實的工作狂。與父親同屬虎年處女座的朱鼎健，對身邊人要求都很高：「即擺喺我面前係唔可以出錯，要深思熟慮。好似觀瀾湖嘅衞生保養做得好好，我經過見到煙頭都會執，以身作則，亦一定要人（下屬）咁做。」
高球會籍分層定價降門檻
【改寫規則】
觀瀾湖為塑造海口項目為綜合旅遊區，及發展深圳住宅商業項目，耗資共120億元人民幣。集團主席朱鼎健揚言營運資金充裕，不急於未來一年上市，而上市日程將視乎開發觀瀾湖新項目的資金需要，首選本港作股本融資。
無意染指海口博彩業
正式接手觀瀾湖後，朱鼎健去年火速聯合蘭桂坊、華誼兄弟和國內導演馮小剛等夥伴，在海口項目將加入電影主題公園、酒吧等綜合旅遊元素，預期明年底前全面啟用。朱鼎健說，海口已建有全球規模最大的高爾夫公眾球場，及礦溫泉水療池，再增加適合年輕人配套，將成為享受家庭樂的旅遊度假區，但絕對無意在海口染指博彩業務。
高爾夫球會傳統上行終身會員制，會籍動輒過百萬元，只屬富豪玩意。但朱鼎健覺得要內地推廣高爾夫，需分層定價來重定遊戲規則，在海口公眾球場打一場最低消費僅480元人民幣，要私隱度高則1,000至2,000元人民幣。而深圳和海口現時亦開放共3個球場，給18歲以下人士免費打波。
靠明星效應發圍
【小檔案】
觀瀾湖由港商朱樹豪於1992年在深圳創立，第三年正式開業啟用後，因為成功爭取41屆高爾夫球世界盃總決賽主辦權，令觀瀾湖在國際間聲名大噪。
球會擅於雲集大量國際一級巨星造勢，包括2001年請到高球天王老虎活士到觀瀾湖比賽。其後球會擴展到東莞，至2003年觀瀾湖已建成12個球場共216個洞，追過美國同業成為全球第一大球會，被列入健力士紀錄至今。
【朱鼎健（Ken）小資料】
年齡：39歲
學歷：加拿大西安大略大學工商管理系
背景：觀瀾湖創辦人朱樹豪長子
人生歷程
1995年：大學畢業後，加入觀瀾湖任董事，專責地產項目及高球業務拓展
1996年：22歲結婚，與太太育有三名女兒
2002年：升任集團副主席，負責開發新業務
2007年
：任集團常務副主席，開發建設新項目海口及雲南觀瀾湖
2011年
：父親離世後，接任觀瀾湖集團主席兼行政總裁
2012年：與夥伴合資120億元人民幣發展深圳觀瀾新城和海口觀瀾湖等多個新項目
2013年：當選全國政協委員