【銅鑼灣】鄭少秋同官晶華89年結婚至今，一直都好恩愛，秋官唔使開工時，好多時都同太太出雙入對，前日下晝4點，秋官就做柴可夫，載住官晶華直駛入銅鑼灣世貿中心停車場，大約十分鐘，秋官泊好車後，兩人朝住崇光百貨公司方向行，不過沿途都係官晶華行先，秋官行後兩個身位，一前一後咁各自行。
夫婦冇交流
秋官雖然戴住帽同黑超，孭住個袋又攞住把遮，打扮普通，但因為佢身形高大，唔少途人都認出佢。佢哋繼續一先一後咁行，穿過崇光再行去東角中心，搭𨋢上咗18樓，原來官晶華陪秋官睇醫生。
入到診所冷氣好凍，秋官同官晶華都着番件褸避免凍親，坐低等候時，秋官又整理吓私人物品，但由泊好車到上到診所嘅時間，秋官同官晶華全程都冇交流，睇嚟呢對20幾年嘅老夫老妻，真係做到一切盡在不言中。
採訪、攝影：梁繼光
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/