【隔牆對論】
有補習天王在網上炫耀，學生使用其補習社出售的「全攻型收音機」應考聆聽試戰無不勝，其實這部售228元的收音機，是在淘寶僅售數十元的國產貨，根本不能干擾其他收音機。
英文科補習天后June Leung梁賀琪說，學生打擾敵戰古已有之，尖子亦然，為入大學，功利地補習很正常，因此補習生意唔憂做；不靠補習升讀中大的學民思潮發言人張秀賢則指，補習天王宣傳鋪天蓋地，令學生誤以為不補習會蝕底。教學相長，在補習社也成為上市公司的年代，是銀貨兩訖的一盤大生意；補習英文的學生，應該先惡補常識，花200多元買一部無用之用的收音機，這一課，學到了甚麼？
記者：倪清江 姚國雄
記：《蘋果》記者
張：張秀賢
名校學生：出現知識貧富懸殊
公開試考生頻投訴考聆聽試時接收受到干擾，不少指向附近有人用附有可拉出天線的收音機，他們稱這類為「全攻型收音機」。
記：去年應考中文和英文聆聽試時，你用哪種收音機？
張：都係用有天線嘅，因為驚咗隔籬會用「全攻型收音機」。係大陸貨，40幾蚊就買到，冇影響前後左右嘅考生，嗰時唔係諗去攻擊人，只係諗防守。范浩揚賣嗰部擺明係大陸貨，成日見到，一鬆手就會走台。咁都有人肯買，反映學生對公開試恐懼。
現在幾乎所有補習導師，不論資深或新畢業大學生，也被稱為補習天王，更甚以型男美女作招徠。范浩揚常有負面新聞，但仍有大批學生報其課程，這次他高價推售全攻型收音機，也一早沽清。
記：為何學生會信服補習天王？
張：𠵱家10架行經彌敦道巴士，8架都係賣補習社廣告。佢哋宣稱補習天王係萬人之師，以高中20幾萬人計算，即佔有半成，因此講嘢會有說服力。
記：你認為補習天王為何能吸引學生？
張：補習社好識包裝，將啲導師包裝成補習天王，將佢哋偶像化，針對學生考試需要，令佢哋覺得唔補唔得，補咗呢個天王就可以攞到五級、有星喎。
記：你去年考首屆文憑試，成績理想，入讀首志願中大政治與行政學系。你中學時有沒有補習？
張：只係中五時搵人補過物理科個幾月，我讀屋邨名校，好少同學冇去補習，成績中等同學裏面，好似得我冇補。物理、生物兩科成績只係
及格邊緣，有啲同學成績好過我都去補習。𠵱家諗番覺得有啲神奇，點解當時堅持得到。其實做多啲舊試題、睇參考書、上堂抄筆記，已係好重要一步。
記：同學、朋友的補習生涯如何？
張：見過有啲人一個月花三、四千蚊補習。我哋朝早8點返學返到下晝4點，仲要去補習社三個鐘，識嘅朋友都8、9點先返到屋企。
讀書勁嘅人會諗，讀得差嘅人補咗會勁，影響到佢哋；差嘅人會覺得，連勁人都補習，點解我唔去？我認為補習應該係畀成績差嘅人去補底，但𠵱家演變成係唔係都補習，學校上堂唔使聽書，去補習社當係上堂。
近年中學公開試放榜，狀元十之七八都承認有補習，補習社也趁機自我宣傳。個別補助天王會借貼中題宣傳，甚或炮製考評局洩漏試題疑雲來谷人氣。
記：是否同意補習助他們晉身狀元之列？補習天王教答題技巧有幫助？
張：狀元本身係叻，攞到5*同5**班人根本係個底厚，唔係好相信補習天王係造王者。補習社攞嚟做宣傳，只係營銷策略。科科都有答題技巧，就算最虛無縹緲嘅通識科都有，但其實差唔多。操舊試題時你會睇評卷參考，可以學埋答題技巧，同補習效果可能差唔多。
記：覺得所謂「補習天王」是否特別精於貼題？
張：今年通識科出拉布，我都貼中啦；我同人補習時，都有教埋今年會出六四事件同港人身份認同關係。貼中題本身唔使技巧，尤其係通識科好易貼題，睇時事就得，每個議題都教，就實會中。補習天王收集咗咁多年嘅試題，可以大包圍貼題。
對根基未必咁好、甚至對某啲科冇把握嘅學生，成日貼中題嘅補習天王係好吸引，會覺得可以幫佢哋縮窄溫書範圍，直情會覺得靠晒佢。
記：你有同人補習，卻又批評補習風氣，為何會這樣？
張：我屋企開琴行，做埋小學補習，我都有同約20個中學生補通識。喺現今補習文化下，反而應該幫家境唔好嘅學生，所以我會收少呢類學生八、九成學費。
補習造成知識上貧富懸殊，因為有錢學生可以補多啲，窮人冇得補。教書應係唔理學生家境點樣，都要幫佢哋，但𠵱家補習社將學生當係老闆，學生冇錢就冇可能係老闆。
記：補習社用超大班或視像教學，有沒有成效？
張：用大班教學，可以喺最短時間教最多人、賺最多嘅錢，視像教學都係一樣，名師同時教到五、六班學生，呢個係好嘅生意模式。教書最重要唔係教啲乜嘢，而係學生問嘢時，老師點樣答。如果連即場教學都要學生睇視像轉播，即係等如買票入戲院睇戲，好難確保學生明白你所教嘅內容。