【銅鑼灣時代廣場】早排賭王三房嘅何超蓮同四房嘅何超盈客串做模特兒，幫二房家姐何超瓊間公關公司嘅慈善攝影展影相。身為公司老闆嘅超瓊當然都要粉墨登場，仲要低胸裝現身，搶鏡程度唔畀兩個妹妹專美。
前日下晝5點幾，超瓊由助手陪同喺銅鑼灣嘅city'super開工，成班人喺賣薯片嘅貨架前拍攝，內容講一身貴婦打扮兼超deep V嘅超瓊喺度揀零食，身後就有一隻人扮嘅猩猩猛叫猛跳，而呢隻猩猩喺之前超蓮同超盈影相嗰陣都出現過。
連環走光
超瓊嘅造型貴氣之餘不失性感，低胸外套加上不時俯身買嘢嘅動作，搞到猛咁春光乍洩，令到場面好香艷，由於場面實在太危險，難怪唔只超瓊要成日檢查自己件衫，佢嘅兩位助手每次拍攝時都好小心喺旁邊贒實以防走光，當攝影師喊停嗰陣，超瓊嘅助手仲即時上前幫佢整理件衫。
喺頭一輪拍攝，可能係超瓊未熱身嘅關係，所以表現比較拘謹，攝影師要不時叫佢：「放鬆啲、誇張啲、表現驚訝啲！」經過三輪拍攝、玩足兩個鐘後，超瓊卒之完成任務，之後佢急急封胸由助手陪住行去時代廣場對面嘅名店換衫，跟住去中環出席時裝品牌Lanvin嘅晚宴。
採訪、攝影：梁繼光
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/